麥國棟打長途戰急唔嚟

猪拉多纳

27/11/2011
文： 黃興桂

最近足總委任來自蘇格蘭欖球聯盟前行政總裁麥國棟，出任足總新行政總裁。Peter都聽過好多有關呢個CEO嘅評價，當中好壞參半。不過Peter希望球迷有遠大目光，畀啲耐性佢，到時先評價麥國棟都未遲。再講吖，受得起高薪唔單止要推廣足運，仲要抵得住批評。做大事嘅人，兩三句閒言閒語又算得係咩！




麥國棟屬非足球背景人士，有人會質疑佢嘅能力，但其實係唔係足球人，又有乜所謂呢？依家又唔係考佢踢波有幾叻，而係考佢推廣及宣傳能力。大家都知香港足球處於一個低潮，要將佢提升至一流水平並唔係咁容易。Peter重申，大家真係要畀多啲時間佢，呢項咁艱巨嘅工程極需要熱誠同耐性。


車仔黑仔踢好波都輸


講番今季英超，短短幾個月已經發生好多古怪事件。好似季初低沉嘅阿仙奴突然翻生，前鋒尹佩斯弗到你唔信。而車路士好哋哋又會變差，成日踢得好而輸波，所以話現代足球幾奧妙呢！任何事都可以發生。至於雲格同保亞斯嘅前途，Peter就真係唔敢亂估。




足球世界千變萬化，冇人知道阿仙奴幾時又跌Watt，亦冇人知車路士何時會大反彈。總之一句講晒，聯賽係長途戰，保持穩定最緊要！




金句：時間會證明麥國棟是山雞還是鳳凰