畢彼特星級紅軍fans

猪拉多纳

27/11/2011


利物浦全球fans眾多，連荷里活型男畢彼特都係紅軍一分子，佢日前受訪時公開表示：「我好多朋友都係利迷，如果我唔係肯定被排擠！」查實「畢佬」嘅索爆老婆安祖蓮娜祖莉都係出名嘅利物浦fans，果真係夫妻同心。




曼城方面，前鋒巴洛迪利「壞孩子」形象太深入民心，依家仲被當成賊！事緣佢日前返去被焚毀嘅舊居，想執番「剩餘物資」，但有鄰居唔認得佢，以為有賊入屋偷嘢於是報警。警方到場後先知係一場誤會，睇嚟巴洛迪利平時同鄰居嘅關係似乎唔多好。




巴洛迪利上月喺屋企放煙花，搞到發生火警要搬離家園，佢日前同一位朋友返去，想攞番私人物品，有消息指呢位意大利國腳主要想攞番電子器材，但被鄰居當成賊，可能係巴洛迪利太過擺款，唔同鄰居交往，所以唔認得佢。


AC祖記爭泰維斯


另外，泰維斯未獲會方批准，近三星期擅自返回阿根廷歎世界，但曼城仍然繼續出糧畀佢，換言之球會已白白嘥咗60萬鎊（約723萬港元）。曼城已經冇晒佢乎，只希望有球會接收呢位射手，據悉AC米蘭及祖雲達斯都有意收購。