高原主場8連勝 惡霸利大明恰沙士菲

猪拉多纳

24/11/2011
文： 走肖

南美球會盃4強首回合，利加大學喺主場對沙士菲，1.65倍主W咪嫌熱。講到底利加大學都係靠高原主場食胡，依家主場8連勝，呢場冇理由放軟手腳，對家沙士菲近排靠過氣墨西哥國腳法蘭高入波，感覺始終靠唔住，作客出事唔奇。（有線61及201、廣東體育周五早上8:15直播）

沙士菲靠法蘭高孭飛

利加大學嘅阿根廷射手靴蘭巴高斯出道初期効力競賽會，對於沙士菲嘅特點同打法，肯定非常清楚，雖然近年佢曾經要到中超搵食，但並冇扔低射門鞋，今屆賽事暫時有4球進帳，而且利加大學係傳統厄瓜多爾班霸，高原主場係最大武器，淨係睇佢哋主場8連勝，就知有幾堅。


另方面，沙士菲近況唔曳，近11場有7勝3和1負，但最近幾乎靠晒法蘭高孭飛，要知道佢已經35歲，賽程咁密跌Watt絕對唔奇，個人近5場勁入4球嘅腳風亦未必保持到，就算沙士菲今屆南球盃6戰有3勝3和，都唔值得過分高估，不如簡單啲信利加大學主場發威好過。