利華城牆擋死火戰車

猪拉多纳

23/11/2011
文： 阿占

歐聯分組賽嚟到最後兩輪，喺E組榜首嘅車路士會作客到德國，同排第2嘅利華古遜上演榜首大戰。呢組車仔、利華同華倫西亞三隊爭出線當中，小弟最睇好利華，一來佢哋今場有主場之利，二來最後一場對手只係小組最弱嘅亨克，有理由相信佢哋呢場玩穩守博一分。車仔讓波信唔過，捧利華1.78倍「讓球主勝」。（有線62、202周四凌晨3:45直播）


利華個如意算盤係點打？車仔依家喺小組有8分，利華有6分，排第3嘅華倫得5分，利華今場目的至少有1分落袋，下場對亨克再贏波拎埋「應得」嘅三分，咁就有10分；而由於車仔同華倫下輪對撼要打生打死，利華就可以坐收漁人之利印印腳晉級！既然係咁，佢哋今場實在無必要冒險同車仔硬碰，反而可以大玩佢哋擅長嘅穩守突擊打法。

波歷克回勇倒戈

利華雖然有主將巴尼達同連拿度奧古士圖長抖，不過球隊似乎慢慢適應咗，而且拿斯賓達、傑斯寧、舒賀爾尼同森姆呢幾個德國國腳狀態唔錯，又有弗番嘅波歷克要向舊東家車仔騷「哥利」，再加埋有之前2場主場分組賽都贏晒嘅賽績支持，今場求和博1分絕對唔係過分目標。

車仔作客勝率低

反而車路士近呢個月表現就比較反覆喇！佢哋啱啱先喺英超惡鬥完利物浦仲要輸鬼埋！防守空洞、中場冇組織，今晚去到德國踢呢場生死戰，連場硬仗話唔會影響表現你信唔信？而最大問題係車仔今季作客成績好差，今季所有比賽9次作客得3勝4和2負，勝出率只得3成3，今場對住一心求和嘅利華，實在無能力全取3分。