阿伯搶般尼補數

猪拉多纳

22/11/2011
文： 麥馬拿仁

今晚有兩場英冠，拿仁力撐「阿伯」反彈贏波！三日前伯明翰全場壓住彼德堡喪攻，攻勢多到不得了，但最後都被逼和，領隊曉頓躁到爆。今晚再於主場出擊鬥般尼，「阿伯」本季聯賽於自己地頭僅失兩粒，後防銅牆鐵壁加上鬥志無限，必搵般尼練靶！（周三凌晨3時45分開賽）




伯明翰季初受盡星散之苦，成績麻麻，但曉帥前季一手一腳帶紐卡素稱霸英冠，功力毋庸置疑，經佢悉心打造下，「阿伯」愈踢愈好，成功兼顧歐霸賽事，一度造出六連勝佳績。


般尼後防穿窿


近四戰伯明翰稍有回落，但實際演出唔曳，上仗馬龍京治、包斯爾亞等製造大量入波良機，可惜最後只能打和彼德堡。賽後客軍領隊戴倫費格遜都話和波要還神，就知「阿伯」有幾犀利。今仗對手般尼人腳唔齊，演出極度不穩，後防更穿晒窿，近三仗輸波狂失八球，咁嘅貨色又點夠「阿伯」砌？