拿玻里主場嚇窒曼城

猪拉多纳

22/11/2011
文： 樂比堅尼

歐聯A組好戲，曼城作客「地獄球場」拿玻里有失分危機！意大利球迷出名狂熱，而拿玻里主場聖保羅球場，簡直係客軍嘅噩夢，曼城班球星身嬌肉貴，今仗隨時嚇到腳仔軟，樂比仔捧「讓球主勝」。（有線64及204台周三凌晨3時45分直播）




樂比仔曾隻身到意大利睇波，見識過意大利足球流氓嘅厲害，點解龍門後面會有架消防車泊喺度？行行吓路會有煙花喺你腳邊爆開？只能夠講睇完波平平安安返到屋企，已經係好大嘅感恩。


放煙花暴動等閒事


不過，以上例子只係濕濕碎，拿玻里球迷惡名昭彰，佢哋經過嘅地方就好似被龍捲風破壞咁，意大利足總曾多次禁止佢哋嘅球迷進入其他球場，另外亦多次罰佢哋閉門作賽，最嚴重一次係○三年有球迷在騷亂中喪生，三十名警察受傷。




不過從好嘅角度睇，拿玻里球迷相當團結，甚至團結得有點過火，○四年佢哋降落丙組作賽，都可吸引超過五萬名球迷入場，難得球隊今季重返歐洲最高水平嘅舞台，你話點會唔搏命！睇番拿玻里呢三季主場成績，不敗率為89%，而近兩屆歐洲賽主場更七場不敗，曼城作客讓波梗係捧主隊！




曼城歐聯經驗尚淺，四場分組賽有三場輸盤，當中包括主場和拿玻里一比一，既然連佢哋最拿手嘅主場都贏唔到，試問作客又點有把握？再者，曼城目前領先拿玻里兩分，今場和波都仲有優勢，隨時攞一分鳴金收兵啦！