「Goal老師」教我如何不愛他

猪拉多纳

20/11/2011
文： Fufu

上周三凌晨睇完德國對荷蘭嘅熱身賽，黑柴冇法子唔對偶像高路斯寫個服字，雖然已年屆33，之前仲喺混帳教頭尹戈爾手上蹉跎咗兩年歲月，但依然自強不息，今時今日佢嘅技術造詣更上一層樓，無論傳、射同頂上功夫都完美無瑕，充滿藝術感，而最令人敬佩嘅，仲係無私嘅團隊精神，令黑柴諗起葉德嫻同許志安首「教我如何不愛他」。只可惜佢表現太出色，搞到荷蘭「殺人王」雲邦美無地自容，惟有用收山腳整傷佢，希望「Goal老師」早日康復，黑柴話過日後無論幾忙，都唔會放過任何德國隊同拉素嘅比賽。


漢堡主場可響勝鼓


講番今晚德甲，漢堡主場對賀芬咸，兩隊都係黑柴深愛同熟悉嘅球隊，賀芬咸波斯尼亞國腳伊比斯域同沙利荷域踢完歐國盃外圍賽力疲心傷，球隊近期鬥志亦飄忽。




漢堡新帥芬克上任後，球隊士氣同狀態都漸有起色，經國際賽休戰磨刀霍霍，今仗有柏歷同伊利斯域一對攻擊重心復出，有力打開主場勝利之門，小讓平半捧上盤。




（有線61及201台周一凌晨零時30分直播）