清水為錢途誓「取」天皇盃

猪拉多纳

16/11/2011
文： 走肖

今晚清水心跳喺天皇盃第3圈主場對鳥取飛翔，1.72倍「讓球主勝」值得捧場，清水原本連傷兵小野伸二都諗住用埋，雖然最終證實唔得，但高層擺明吼住1億日圓冠軍獎金，同埋下屆亞冠盃席位，撲水出糧畀班球星，高原直泰加龍格保應該夠殺。（開賽時間：周三晚6:00）


開季前清水請咗教過伊朗嘅高迪比執教，又先後簽入前鋒高原直泰同中場龍格保兩大貴價名牌，加上安排小野伸二做新隊長，當然希望踢得好好睇睇，點知聯賽戰績根本冇突破，使咁多錢得個吉，想踢來屆亞冠盃，唯一可能性係稱霸天皇盃，為咗達成目的，據講清水打算用可以排出嘅最強陣容應戰，實行打沉鳥取振軍心。

鳥取仍重用38歲服部年宏

雖然中場大腦小野伸二右膝腫痛可能要抖兩星期，射手保斯基同門將山本海人喺應付完世盃外圍賽後，又多數趕唔切歸隊，但有高原直泰同龍格保孭飛，牌面依然唔弱。對家鳥取飛翔上一圈雖以3:0淘汰熊本羅亞素，但近期戰績就唔多掂，近6場僅得1勝5負，曾經代表日本國家隊上陣嘅38歲中場服部年宏，依然被當係寶長期打正選，睇落唔似有得救，長期捱打唔係冇原因，作客慘敗唔奇。