網民惡搞施治變蝙蝠俠

猪拉多纳

11/11/2011

捷克自從93年同斯洛伐克分裂之後，原來連續四屆都入到歐國盃決賽周，96年殺入決賽輸畀德國，04年四強不敵最終王者希臘，歐國盃都算幾旺捷克，為咗保持呢個良好傳統，効力車路士嘅門將施治雖然上周聯賽整傷個鼻，但今仗仍然會戴住「鬼面罩」上陣，加埋本身嘅頭套，有網民惡搞話佢似十足蝙蝠俠。


施治上周六於英超對布力般時傷鼻，但由於佢始終係捷克最可靠嘅門將，國家隊生死關頭都要頂硬上。前日施治出席賽前記者會，就攞咗個新鬼面罩出嚟，話自己將會戴住保護罩出戰，其實佢之前已經試過戴晒面罩同頭套影相放上網，仲畀人話佢似Batman，相信施治呢個造型行出嚟都應該幾好笑！

迪素杜域冇幫朗尼求情

另一方面，被朗尼踢後腳嘅黑山後衞迪素杜域否認主動寫信畀歐洲足協，幫因此被逐而要在歐國盃分組賽停賽嘅朗尼求情：「只係有俄羅斯報紙問撐唔撐朗尼，我話如果有人叫到就OK，但就冇自己主動寫信囉！」