波迷玩嘢C朗嗌美斯

猪拉多纳

11/11/2011

大批波斯尼亞球迷去機場「熱烈歡迎」葡萄牙球星基斯坦奴朗拿度，但就故意大嗌美斯嘅名字，擺明要落佢面，暗寸呢位皇馬射手唔及巴塞球星美斯，但C朗EQ高，笑笑口面對。當地警方亦加強保安，派多架警車護送葡萄牙隊巴，以免一眾球星受襲。


C朗預咗比賽時會被主隊球迷柴台，但估唔到對方咁快出手狙擊，去到機場暗寸佢唔及美斯，當C朗步出通道，球迷即時起哄大叫：「美斯、美斯！」C朗聽到只係笑笑口，快步離開。不過C朗亦有好多人撐，皇馬隊友卡卡就話，C朗技術比美斯更全面，左右腳及頭槌都掂，射罰球亦得，係佢出道以來所見最出色隊友。


前皇馬名將森莫蘭奴亦大讚C朗屬於現象級球員，提升咗皇馬整體級數。C朗受到主隊球迷刺激之後，今仗更加會大打爭氣波，要令對方記得佢嘅大名。