重用「波圖雙箭」勝在慳時

猪拉多纳

10/11/2011

巴西今晚對完加蓬後，下周二凌晨就會同埃及拍跳，領隊文奴文尼斯決定打造「波圖雙箭」，用呢兩場熱身賽考察侯克同基巴拉奧比（圖）嘅表現，點解咁睇重佢哋？文帥就話：「慳時間吖嘛！」

侯克 基巴拉奧比贏默契

各大聯賽踢到如火如荼，國家隊備戰時間點會充足吖？今次巴西主帥文奴文尼斯只係揀咗3位前鋒，除咗効力華倫西亞嘅莊拿斯干卡維斯之外，其餘兩位就係侯克同基巴拉奧比，文奴文尼斯賽前表示：「國家隊備戰時間其實好少，侯克同基巴拉奧比喺波圖夾慣夾熟，唔使再嘥時間培養默契，照計應該會好合拍。」


侯克上季幫波圖成就三冠王霸業，全季入咗36球，奈何「森巴兵團」前線人才濟濟，「綠巨人」喺國際賽大舞台一展身手嘅機會唔多，今晚正正係佢騷哥利嘅黃金機會，呢位將會披上巴西9號球衣嘅前鋒揚言：「重新獲得徵召嘅感覺簡直一流，我需要感謝主，但就要靠自己嘅努力去奠定正選席位！」