聖莊士東劏「鴨」款待新帥

猪拉多纳

07/11/2011
文： 亨格比利

太子爺同新領隊首度揸旗，換轉你係球員都加多兩錢肉緊博表現啦！蘇超「四哥」聖莊士東啱啱有新主席上任，今晚仲會由前韋斯咸悍將盧馬斯首度領軍，主場出擊對住陣容不整兼作客例牌腳軟嘅鴨巴甸，小讓平半梗係捧上盤！（開賽時間：周二凌晨3:45）


鴨巴甸陣容不整


聖莊士東主席基奧夫布朗上周四唔撈，結束長達25年任期，由囝囝史堤夫繼任，會方亦都請咗盧馬斯領軍，呢位北愛名將昔日執教諾域治青年軍同韋斯咸預備隊都有口碑，加上對上兩任聖莊士東主帥包括奧雲高尼同麥恩尼斯都先後過咗英國搵食，仲愈撈愈掂，盧馬斯當然想步兩人後塵揚名立萬。




對家鴨巴甸暫列下游，今晚除咗有後衞賴恩積克同前鋒科隆停賽之外，仲有中場米爾森因足踝傷缺陣，況且首席射手華儂亦有傷在身，以佢哋今季聯賽作客未贏過嘅戰績嚟睇，造訪聖莊士東唔似會有運行，一於捧上盤賀盧馬斯旗開得勝。