肯薩斯兩球在手打守「細」波

猪拉多纳

02/11/2011
文： 朱楓

聽朝美職季後賽又再爆發，肯薩斯體育會喺主場對科羅拉多急流，合演東岸4強次回合。首回合肯薩斯作客贏急流兩球，今場唔贏都可以出線，對家急流又受到嚴重傷停困擾，想反撲入波都唔容易，今場不如要1.68倍入球細！（now633及660台周四早上8:00直播）

其實肯薩斯今季初曾經一度8場不勝，但自新主場啟用後，成班波脫胎換骨，最後仲後上取得常規賽東岸冠軍，全季更只得1場輸多過1球或以上。

首回合肯薩斯作客贏急流2:0，取得自96年後首場季後賽作客勝仗，贏波功臣首推梅開二度嘅賓貝利，呢位「二年生」近況着火，近4場入4球，不過肯薩斯首回合作客都贏兩粒，形勢非常樂觀，根本毋須再求勝，以佢哋連續3場不失表現，今仗應該會以穩陣行先。


急流多名主將缺陣


上年勇奪美職總冠軍嘅急流，今年成績只係一般，只係靠外卡賽擊敗機員晉級。現時出線形勢惡劣，佢哋當然唔會咁快認輸，中場韋斯湯臣仲舉出早前喺中冠盃作客梅塔帕、即使教練加利史密夫唔在陣都贏3:1嘅例子，激勵隊友要搏命再創奇迹，可惜有鬥心唔係大晒，首回合傷出嘅前鋒卡雷布科蘭、中場木村宏介同後衞德魯摩亞，今仗都未必踢得，加上後衞泰朗馬素爾又要停賽，前鋒卡斯同隊長馬斯杜安尼仍然養傷，陣容殘到爆，聽朝破到蛋已經偷笑啦！