曼城真正考牌戰

猪拉多纳

02/11/2011
文： 黃興桂

歐聯死亡A組成為三頭馬車之局，拜仁慕尼黑狀態一絕，佢哋個4231陣式非常機動同圓滑，就算淨係搵馬里奧高美斯打單箭頭，其他進攻球員都可吼準機會後上助攻，好似舒韋恩史迪加咁，經過上次對拿玻里失分後，今場拜仁會向對手還以顏色，整記悶棍畀拿玻里，賠率熱就熱啲，但絕對係有買趁手。


拜仁搵中堅分波夠高明


洛賓之前喺拜仁作用舉足輕重，但依家球隊已經有列貝利上腳，如果出埋洛賓可能仲衰咗。事實上，拜仁現時有湯馬士梅拿及卻奧斯等幫手進攻，已經唔使倚重洛賓。拜仁教練軒歷基斯好醒目，甚至識得用左腳中堅畢斯杜巴分波，或者搵佢做死球專家，絕對係良帥懂得利用隊中球員特點嘅出色例子。拜仁今年成績咁好，其中一招就係搓到順先，引到對手球員甩位，再由畢斯杜巴分波去右邊，呢個戰術運用得好機動，睇落真係好舒服，今次對住拿玻里可故技重施。


拜仁贏波機會高，但賠率較為乏味，建議大家串埋曼城，呢條二串一都幾有把握。曼城上輪有幸後來居上反勝維拉利爾，維拉利爾限米煮限飯，已經打得絕好。曼城目前喺英超形勢好，但於歐聯形勢不妙，食粥食飯都睇呢場，趁住對手主將基奧斯比羅斯受傷實力受削，一定要解決對手，如果對維拉利爾都贏唔到，對拜仁同拿玻里更難搶分。今場對曼城嚟講係歐聯關鍵大戰，若然咁都贏唔到，就證明佢哋只係「門口狗」，同歐聯豪門仲有距離