小豬下廚夠鑊氣地頭龍拜仁炒起拿玻里

猪拉多纳

02/11/2011
文： 安高

喺歐聯死亡A組帶出嘅德甲班霸拜仁，今晚返無敵主場迎戰意甲勁旅拿玻里，力奇睇好拜仁大勝，事關拜仁喺安聯球場已經累積8連勝，喪入33球未失1球，強勁氣勢對住今仗有後防重心保羅簡拿華路停賽嘅客軍，想贏少球都難，我捧1.68倍「讓球主勝」！（有線63及203周四凌晨3:45直播）


拜仁主場8連勝


拜仁上月中連續2戰不勝，唔少人以為佢哋狀態回落，點知佢哋一返主場就即刻2連勝，仲要夾埋得失球係10:0堅勁揪。事實上，佢哋喺安聯球場真係勁到冇朋友，唔止取得8連勝，就算單計歐戰，亦係近10戰贏9場o架！再講，拜仁尋晚亦有好消息，就係「小豬」舒韋恩史迪加趕得切傷愈，今仗可以披甲，有番部中場發電機喺度，夾埋大勇嘅列貝利同馬里奧高美斯，要入波自然話咁易。


拿玻里呢邊，中堅保羅簡拿華路停賽影響唔細，最慘係佢哋上周末聯賽輸畀卡坦尼亞，有成半場時間係打少個，體力未必可以及時回復。仲有一點，原來拿玻里歷來6次出訪德國，係得3和3負未贏過o架，今鋪憑咩去同拜仁鍊吖？