巴塞爭氣-2炒起馬略卡

猪拉多纳

29/10/2011
文： 亨格比利

巴塞隆拿最近跌晒Watt，唔少人都將矛頭直指連續285分鐘食白果嘅美斯，之不過球王都係人，都會有低潮，小弟就睇好佢今晚走出谷底，帶領巴塞大炒馬略卡省番靚個招牌，「-2」都照捧1.56倍「讓主」。




（now632及660台周日凌晨2:00直播）


碧基 佩奧爾傷愈復出


據西班牙《每日體育報》作出嘅統計，巴塞今季不再無敵皆因過分倚賴美斯，「地上最強」喺西甲入咗27球，美斯就佔咗10球，以佢今季50腳射門嚟計，入球率只係得20%，即係話如果美斯死火，巴塞都幾大鑊！但係主帥哥迪奧拿响賽前記招就極力維護美斯仔，仲話球迷買飛入場都係睇佢啫。




今季仲未喺西甲客場開齋嘅美斯，更加畀《每日體育報》揶揄為「唔爆嘅手榴彈」，呢啖氣今晚唔搵馬略卡出點得？好消息係一對中堅碧基同佩奧爾告傷愈復出，後防冇顧慮，對住連續8場聯賽都有失波，並有守將柏保路卡沙里斯同蘇華隆倦勤嘅馬略卡，巴塞當然可以盡情喪攻做番齣好戲。