全北睇住食 主場W「德」

猪拉多纳

26/10/2011
文： 九叔

亞冠盃4強次回合今日爆發生死戰，响呢兩場南韓對抗中東嘅大戰入面，全北汽車個1.44倍主W，絕對比水原藍翼作客讓平半嘅上盤穩陣！




傍晚率先上演嘅全北汽車對沙特勁旅伊蒂哈德（now671台周三晚6:00直播），形勢一面倒有利主隊，事關全北首回合作客贏3:2，今日主場出擊即使和波或者輸0:1，一樣可以躋身決賽，況且全北剛啱蟬聯韓職常規賽冠軍，六強季後賽又有排都未開打，家陣可以專心應付亞冠盃。


艾薩德少3主力益晒藍翼


最重要係全北主場勁，喺今屆亞冠盃5次地頭出戰贏晒入17球，伊蒂哈德去到全州作客仲要焗攻，隨時慘敗一場。尤其是全北鋒將李東國有個朵叫「中東殺手」，雖然佢小腿有輕傷，但係未贏過亞冠盃嘅遺憾，畀到呢個「獅子王」好大動力。




另一支韓職強隊水原藍翼，今晚就要作客卡塔爾對艾薩德（now671台周三晚11:00直播），佢哋嘅形勢非常惡劣，因為首回合主場淨吞對手兩蛋，今鋪客場要翻身，必須贏兩球以上，十分惡踢。




不過水原都唔係冇優勢，上場兩隊打大交，唔計教練，亞洲足協只係罰咗佢哋件前鋒列斯迪停賽，相反艾薩德就有前鋒卡達基達及尼安坐波監，而且畀人打爆咗鼻骨嘅中場艾哈邁德要抖成個月，一次過少咗3件主將。




至弊係艾薩德中堅李正秀上次開片竟然幫番昔日嘅水原隊友，搞到更衣室氣氛勁尷尬，雖則艾薩德教頭話會體諒同保護佢，但李正秀今晚有冇份踢都成疑，內訌加殘陣，艾薩德想再𡁻水原有難度，所以水原個上盤可以博吓。

thinkpad