炒完紅魔個個心雄 曼城讓半臂照破狼

猪拉多纳

26/10/2011
文： 亨格比利

呢期球壇最紅嗰隊，唔使問都知係曼城啦！呢支英超新貴啱啱以6:1屠宰宿敵曼聯，成功喺聯賽榜拋甩紅魔5分續居榜首，全隊上下個個心雄，今晚轉戰聯賽盃造訪狼隊，就算領隊文仙尼派二線兵出擊，實行讓半臂，要延續強勢大炒對手照計綽綽有餘，2.12倍「讓客」信得過。（now639台周四凌晨2:45直播）


拿斯尼 迪斯高孭飛搏殺


今場聯賽盃16強係1974年決賽翻版，當年狼隊就贏波捧盃，不過今時唔同往日，曼城去到奧脫福都可以大炒紅魔，區區一隊聯賽7場不勝嘅狼隊點做攔路虎呀？曼城要應付幾條戰線，兵源充足係佢哋最大嘅優勢，相信領隊文仙尼會好似上一圈淘汰伯明翰咁，派半力抗衡。


「頹狼」近7戰2和5負


照亨格比利睇，薩巴列達、高拉洛夫、高路托尼同傷愈嘅尼祖迪莊都會擔正，喺「曼市打吡」做後備嘅拿斯尼同迪斯高亦會復任正選，當然唔少得上一圈射入世界波嘅重生「玻璃人」夏格維斯啦！話就話半力，咁嘅人腳對住狼隊都夠照。




主場嘅狼隊開季係威係勢，點知打後7場聯賽只係錄得2和5負劣績，部分球迷已經對領隊麥卡菲好不滿，上周六場英超仲喺比賽尾段狂噓佢添。呢場波小弟有睇，主場嘅狼隊最終以2:2逼和史雲斯，麥卡菲個樣好似贏咗世界盃咁，喂，大佬！對面嗰隊升班隊伍嚟㗎咋，唔係咁冇大志呀？家陣狼隊仲係有後衞蘇巴、奇雲科尼同前鋒史提芬費查倦勤，想偷曼城雞？輸少當贏啦！