拜仁「主其他」飲勝

猪拉多纳

26/10/2011
文： 蘇斯黑柴

德國盃第二圈拜仁慕尼黑主場出師，迎戰德乙恩高斯達特，今場係巴伐利亞州史上值得紀念嘅大日子，兩支同城隊伍歷史上首次喺正式賽事進行打吡戰，恩高斯達特上下都對呢場波感到興奮，但基於級數相差太遠，即使拜仁半力出擊都足以大炒對手，一於敲3.4倍拜仁「主其他」波膽。




（無綫翡翠台周四凌晨2時30分直播）




恩高斯達特只係德國「嬰兒球會」，○四年成立，於第四級別聯賽起步，直至○八年首度殺上德乙，但經驗不足以尾二成績回降德丙。


恩高斯達特乙組失波王


佢哋上季捲土重來再殺上德乙，得第十四名總算護級成功，但今季無以為繼，目前喺德乙排包尾，係聯賽失波最多球隊，近四戰全敗仲勁失十五球，包括主場面對下游球隊波琴，喺半場領先三比一之下倒輸三比五，防線根本連德乙水準都冇，今仗可以帶定隻籮去安聯球場抬蛋。




恩高斯達特大部分球迷同時亦係同市球隊拜仁球迷，今仗能夠喺德國盃碰上自己偶像球隊已經好興奮，根本冇條件同心態去抗衡。




拜仁向來都唔輕視德國盃，雖然喜歡輪換嘅老帥軒歷基斯今仗會派出部分副選上陣，但奧歷、泰摩斯卓克、尼斯彼德臣、迪亞高干坦圖，甚至宇佐美貴史同啱啱喺聯賽開齋嘅阿拉巴，質素都遠在客軍球員之上，加上剛於聯賽輸畀漢諾威，今場矢志求大勝重拾信心，尤其呢場打吡戰咁有紀念價值，試問拜仁又點肯衰至得o架？