烏甸後備兵夠o趙馬體會

猪拉多纳

20/10/2011
文： 朱楓

出後備代表投降？未必！今晚歐霸盃「死亡I組」爆發榜首大戰，烏甸尼斯會喺主場硬撼馬德里體育會。雖然烏甸之前兩場分組賽均半力出擊，但踢落唔曳得過班正選，反觀馬體會就名大於實，今仗仲要唔齊章，朱楓覺得呢場平手盤玩烏甸可以話坐走望贏！




（有線61及201周五凌晨1:00直播）




馬德里體育會同烏甸尼斯目前喺「死亡I組」齊齊彈出，各有4分，分別領先雷恩同些路迪3分，今仗邊隊再贏，出線可謂坐定粒六。雖然意甲嘅烏甸尼斯，對今屆歐霸盃唔算太重視，之前對雷恩同些路迪，都係派半隊正選再溝半隊後備應戰，但踢落一啲都唔曳，左翼衞保羅艾美路、中場艾文阿布迪同艾曼紐巴度嘅表現都極之對辦。


迪拿達利孭飛攻堅


基於今晚主場出擊，教練古度連可能會好似首場主場對雷恩咁派射手迪拿達利攻堅，加上中場比斯日前對阿特蘭大領紅，嚟緊一輪意甲要停賽，今場好大機會獲派上陣，就算翼衞伊斯拿賽前暗示自己下年暑假可能過檔國米，朱楓覺得烏甸今仗仍力足全取3分。




同烏甸相反，前屆歐霸盃冠軍馬體會今屆睇落好重視呢項賽事，之前兩仗分組賽對住些路迪同雷恩都派晒法卡奧、迪亞高等主力迎戰，但踢落只係一般，特別上輪對雷恩，如果唔係臨完場前趁對手大意快開死球扳平，最後冇可能搶番1分。


馬體會死火4場不勝


睇番往績，其實馬體會近況都唔係幾掂，已經4場不勝，加埋更只入得1球，加上隊長兼後防大將安東尼奧盧比斯因腿筋受傷肯定缺陣，前鋒伊度亞度沙維奧同「土耳其美斯」阿達杜蘭又上陣成疑，作客開季至今暫時只輸過畀阿仙奴嘅烏甸，你話仲點捧得落手？