里爾搵「米」煲魚生粥

猪拉多纳

18/10/2011
文： 查里阿蛋

又有邊個估到前一季仲係3冠王嘅國米，依家要喺意甲護級？「藍黑軍」依家同降班區只有1分之差，再冇起色下季分分鐘要踢意乙！佢哋喺歐聯亦唔好得幾多，今晚喺B組作客里爾，點贏先？雖然里爾上兩場歐聯都和波收場，但係對住霉爆嘅國米有力小勝，扒冷博3.65倍「讓球和」啦！




（開賽時間：周三凌晨2:45）


國米科蘭 森美爾唔踢得


唔知莫連奴走嗰陣係咪落咗國米降頭，前後換咗4個教練成績都冇起色不特止，上一輪聯賽仲輸畀卡坦尼亞跌落尾4，創103年嚟最差開局。低處未算低，射手科蘭唔合上陣資格，連阿根廷後衞森美爾都加入埋十字軍，教頭雲尼亞里頭痕到爆！雖然中場大腦史奈達傷愈復出係一支強心針，但佢狀態未必足，小妹就唔睇好佢可以領軍贏里爾。




里爾今季喺法甲話就話有少許回落，但已經8場不敗之餘仲場場有波入，新援祖高爾轉會後重獲新生，仲同主力夏薩特擦出火花，表現大獲好評。睇番往績，里爾對上3仗主場對意大利球隊都未失過波，今場迎戰國米要小勝1球，相信冇乜問題。