富山勝利W偏熱秤先

猪拉多纳

16/10/2011
文： Blackjack

按照「水鬥水、博主隊」嘅理論，今日富山勝利、FC燕豪芬同費倫斯3隊都抵玩，一於就攞呢3個主勝博條3串4，有28倍回報相當唔錯，而且中兩場就保到本添。




先講場日乙富山勝利對北九州向日葵，論排名同近況，富山冇一瓣佔到優勢，只係往績秤先嘅啫，但係今日佢哋有後衞平出涼左腳骨折等緊開刀，對住有富士祐樹坐波監嘅北九州，完全冇必勝把握。不過，足智彩似乎幾睇好佢哋，個主W得2.15倍明顯偏熱，主場已經3戰不勝嘅富山，今勻可能真係會勝利番次。


荷乙主勝率高撐FC燕豪芬


荷乙呢個禮拜先開始受注，呢個次級聯賽嘅球隊，多數靠主場搵食，除咗阿高夫、丹保殊同安曼3隊，荷乙其餘15隊波嘅主勝率都喺50%或以上，FC燕豪芬雖然往績佔唔到優勢，但係今日响自己地頭對住防線鬆散嘅威廉二世，贏波唔會係天方夜譚。


葡盃中立場位置近費倫斯


至於場葡萄牙盃首圈賽事，費倫斯對國民隊，雖則响中立場地施薩米古夏奧球場上演，不過嗰邊比較貼近費倫斯，所以連費倫斯主帥馬查度都認，從地理位置上講，佢哋其實係有主場之利嘅，所以有信心W出喎。而且費倫斯今場只得後衞漢歷基有傷或者唔踢，國民隊就連傷路易斯阿爾拔圖、祖奧奧利里奧、米希歷3件中場，進攻組織能力大減，費倫斯可以睇高半線。