前鋒劏「鵝」宴客

猪拉多纳

16/10/2011
文： 走肖

川崎前鋒今日喺日職主場對新潟天鵝，關乎嘅唔止3分咁簡單，呢場佢哋招待70個東日本大地震重災區嘅岩手縣小學生現場睇波，剛啱好番喺日皇盃復出嘅稻本潤一話明，為咗鼓勵災區小朋友，無論點都要贏波，信佢要捧1.78倍主W。（now633及660台周日下午2:00直播）


稻本 中村重組黃金中場


雖然前鋒有中場田阪祐介同後衞田中裕介停賽，中堅橫山知伸未傷愈，射手祖尼奴最近又不滿成日被換走，公開同教練相馬直樹玩對抗，但今場依然決定撐前鋒。點解？因為養傷3個月嘅稻本潤一踢得番波，可以同中村憲剛重組「黃金中場」，賽前佢仲誓神劈願話唔贏唔得添！




今次前鋒招待陸前高田市小學生進行兩日一夜「修學旅行」，除咗睇波，仲安排佢哋去川崎市嘅多啦A夢博物館，而且上個月前鋒拉隊到岩手縣探訪呢班學生，當日臨近生日嘅稻本潤一，見到啲小朋友準備好蛋糕為佢唱生日歌，感動到爆，所以決定要為災民而戰。




再講，前鋒經歷完創會以來最慘烈聯賽9連敗後，近期連盃賽連續5場不敗強勢反彈，要打沉天鵝唔難，畢竟對方防線易散過豆腐，近9場喪失13球，唯一保持清白賽事係日前喺日皇盃贏唔夠班嘅富山新庄，好難扭轉近6次作客川崎全敗宿命。