漢堡大戰弗賴堡

猪拉多纳

16/10/2011
文： 蘇斯黑柴

漢堡終於搵到新教練，喺球員時代効力拜仁慕尼黑嘅芬克將會上任，呢位少帥近季帶領巴素利橫掃瑞士超級聯賽，上月尾至帶領巴素利喺歐聯作客奧脫福，同曼聯踢成三比三，各方面都對佢拯救漢堡抱有好大期望，不過佢要聽日至正式上任，今晚漢堡作客弗賴堡（有線61台周日晚9時30分直播），就由體育主管阿連臣領軍。


伊利斯域「猛虎出柙」


阿連臣今仗只係掛名主帥，球隊繼續由無牌助教卡度素領軍，佢帶咗漢堡兩場，球隊演出已漸有起色，今仗更加傷疲盡起，喺轉會窗關閉前一刻買入嘅中場大將、前凱沙羅頓靈魂伊利斯域終於坐滿四場波監，可以首次為漢堡校炮，進一步提升球隊攻力，今晚面對今季八場聯賽有七場開大嘅弗賴堡，捧大盤。