英格蘭點可以冇朗尼

猪拉多纳

16/10/2011
文： 黃興桂

上帝造人都幾公平，冇話畀你好晒。好似英格蘭射手朗尼咁樣，現時處於當打之齡，出道以來球技隨住波齡不斷進步，依家踢法全面、唔打自私波，而且睇通局勢，獨當一面。不過，佢嘅紀律問題由始至終都冇改善，成為足球事業最大絆腳石。




朗尼對黑山鹵莽領紅，佢出道至今都冇改善脾性，波就識踢，但唔識處理個人紀律，多次被趕出場。足球係隊際運動，好似佢呢類重心棋子如果常常畀人趕出場，影響真係好大。喺非英格蘭球證心目中，朗尼已被列入黑名單，佢仲成日犯下呢啲腦筋上嘅錯誤，成為球隊或教練嘅liability，拖累整支球隊。


歐國盃爭霸重要棋子


作為一個優秀球員，要好波又有品，由細教育真係好重要。歸根究柢，朗尼出身低微只係利市街童，係欠缺良好教育嘅壞孩子。去到曼聯跟咗費爵爺咁多年，費Sir實會灌輸好多正面態度畀佢，希望呢位球星冷靜作賽。不過，朗尼小時候冇老費睇住，佢爸爸同阿叔近期捲入賭波案，明顯係個壞榜樣。




想減少計時炸彈爆發，領隊同教練都有責任，練波或比賽前要同球員洗腦，強調如果球員被趕出場，會令成場波失預算。球會亦要有內部紀律，咁先起到阻嚇作用，減少球員失控，避免意外發生。




英倫三島球員好多時喺國際賽面對雙重標準，依家朗尼停三場，即係天亡英格蘭2012年歐國盃分組賽。咁到底領隊卡比路應唔應該帶朗尼踢歐國盃呢？老實講，朗尼稱得上係英倫三島嘅美斯，英格蘭唔係淨係諗三場波，而係部署攞冠軍，廿三人名單之中必需要帶埋呢個咁超卓嘅球員，所以Peter支持卡比路帶埋朗尼去。




金句：朗尼一流技術，九流紀律！