馬賽咬唔入圖盧茲

猪拉多纳

15/10/2011
文： 力奇

老牌勁旅馬賽今季表現大走樣，9戰只得8分排第13，班主路爾斯里費絲仲威脅話如果成績冇改善，唔排除會賣盤跳船添！士氣曳爆嘅馬賽今晚作客圖盧茲，仲有快翼華布拿、中場迪亞華同守將艾斯派古達停賽，殘陣想翻身難過登天，平手盤捧1.92倍嘅圖盧茲啦！（now714台周日凌晨1:00直播）


新季成績差班主話賣盤


馬賽開季至今9戰只得1勝，依家相距「一哥」巴黎聖日耳門13分，對於呢支季前被視為爭標分子嘅球隊嚟講，戰績實在令人相當失望。主帥迪甘斯一向勁有威望，暫時仲叫做保得住個帥位，但再輸落去就真係難講，最慘係班主仲喺呢個時候落井下石話賣盤，就算佢日前特意嚟觀操諗住振奮軍心，睇怕都幫唔到幾多。




人腳方面，前中後3線各有主力停賽已經大件事，有望傷愈復出嘅箭頭基格納，始終抖咗成個月，狀態唔慌好得去邊，真係咪寄望太多。反觀對家圖盧茲新季表現神勇，目前排緊聯賽榜第4，9戰只係輸過2場咁大把，今仗佢哋強陣兼得地利，平手盤應該封咗蝕本門。