車仔冇王子仲可愛

猪拉多纳

15/10/2011
文： 張志德

就算唔係職業球員，只要有踢開波，就知「腳風」係幾咁重要。有時腳風唔順，對住個空門都射唔入，呢啲嘢真係冇得講，如果要腳風順，就一定要夠信心；費蘭度托利斯加盟車路士大半年長期不濟，好似撞咗邪一樣，已經唔可以單單賴腳風唔順，而係佢心理質素曳，冇信心又點踢好波？




無論於馬德里體育會定利物浦，托利斯周不時能以一人之力扭轉局面，但轉會車路士可能身價太高，佢希望以大量入球來證明自己物有所值，正所謂欲速不達，最終希望愈大失望愈大。現時「王子」的確有回勇之勢，但離最高水準仲爭一段距離，與其不斷畀機會佢，不如另覓其他鋒將代替。


愛華頓靚績靠唔住


前仗英超托利斯領紅出場，上仗車仔用史杜列治掛帥鬥保頓，呢名英格蘭新仔前鋒梅開二度，作用仲大過托利斯，今晚車路士主場鬥愛華頓，「王子」繼續要坐波監，對球隊嚟講可能仲好。車仔本季打來四平八穩，近兩戰英超大勝對手，顯示出季初缺乏嘅霸氣，愛華頓作客有排捱。




「拖肥」近四次作客史丹福橋未輸過，戰績係硬淨，不過早前鬥曼城，本身係對手剋星，但最終都吞兩蛋，今戰一於捧車路士「讓球主勝」。




（有線300及200台周日凌晨零時30分直播）


張志德


本港至型足球明星，519入波功臣，現為有線電視台柱級資深講波佬，人稱鬼Sir。鬼Sir睇波有乜獨到見解，毫無保留話晒你知。