不來梅多蒙特疲兵獻細

猪拉多纳

14/10/2011
文： 蘇斯黑柴

今晚德甲獨腳戲分量十足，今季回勇嘅雲達不來梅主場迎戰衞冕嘅多蒙特，呢場大戰門票早已沽清，兩軍實力亦旗鼓相當，但考慮到雙方都有多名攻擊主力啱啱遠征完國際賽，返到嚟踢周五波未回到魂，今場黑柴心水係2.05倍嘅細盤。（有線61台周六凌晨2時30分直播）


香川真司比沙路遠征歸來


多蒙特係上屆盟主，但今季踢落銳氣不足，前線羅拔利雲度夫斯基上仗對魚腩奧格斯堡連中三元，但本身質素同把握能力始終差，一遇強隊就冇貨交，另一主力射手巴里奧斯啱啱傷愈狀態未足，加上中場大將香川真司今季狀態低沉，佢哋上場作客踢到補時至靠守將比薛斯基入奠勝球，險勝緬恩斯取得今季作客首勝。今仗賽前更有多名主力包括曉姆斯、根度簡、蘇保迪、比列錫、羅拔利雲度夫斯基、巴拉斯塞高斯基等離隊踢國際賽，香川真司更要飛番日本，喺周二對塔吉克一仗踢足九十分鐘，經過長途跋涉未必回到氣，今場作客打硬仗唔係咁容易入波。


阿拿奧杜域停賽


雲達不來梅今季表現同成績比多蒙特更佳，加上往績亦剋住對手，今仗主場出擊平手盤本來好值博，但考慮到當弗箭頭比沙路啱啱返南美為秘魯搏咗兩場世界盃外圍賽，兩場都踢足九十分鐘，對呢位卅三歲老將無疑係一大負擔，另一箭頭阿拿奧杜域停賽，進攻中場肯特過去一周又因為重感冒缺練，球隊攻力難免受損。不來梅今季成績改善建基於防線進步，今仗主場出擊唔會多失，考慮到兩軍近五次碰頭有四次開細，今場入球細有2.05倍值得一博。