伊拉克硬朗 國足咬唔入

猪拉多纳

11/10/2011
文： 樂比堅尼

世界盃外圍賽亞洲區A組上演重頭戲，中國於深圳迎戰伊拉克。雖然中國近年嘅國際賽成績有改善，亦搵到名帥甘馬曹執教，但踢硬仗嘅能力依然冇計，伊拉克貴為○七年亞洲盃冠軍，比中國早十六年亮相世界盃，樂比仔認為中國難讓對手，捧「讓球客勝」。（有線61及201台周二晚8時15分直播）




伊拉克一向係亞洲區實力分子，世界排名偏低，只係因為踢國際賽嘅機會唔多，但每逢大賽都交出成績，佢哋目前喺A組同中國一樣兩戰得三分，故今仗可謂非常關鍵，兩軍近六次交手各贏兩次，另外兩次打和，可見兩隊實力非常平均，中國讓波冇理由唔捧對家。


中國踢大賽即露餡


事實上，中國近年踢國際賽成績好似有改善，但大部分係熱身賽，去到真正埋牙階段，好似今年嘅亞洲盃決賽周咁，中國即刻露饀，連分組賽都未能出線，依家二十強賽中國面對約旦同伊拉克兩大強敵，計實力中國完全冇優勢，只係名氣同世界排名，先至令中國賠率咁熱。


薛高熟晒亞洲架步


可能好多球迷對中國教練甘馬曹寄予厚望，但要佢喺短期內適應及摸清球員嘅底細相當困難，反觀伊拉克領隊薛高喺亞洲搵食已一段日子，對亞洲對手有一定認識，如果比較兩大名帥嘅話，樂比仔較信任薛高。




中國另一弱點係對抗性弱，有報道指，甘馬曹認為新一代中國球員拚搶強度不足，球員嬌生慣養，可能同一子政策有關，樂比仔某程度上頗為認同，因為中國近年對西亞球隊經常處於下風，伊拉克球員踢法同體格較似歐洲，中國體形上較輸蝕，作客嘅伊拉克有機會偷到雞。