西班牙砌唔贏捷克

猪拉多纳

07/10/2011
文： 朱楓

今晚西班牙喺歐國盃外圍賽I組作客捷克，唔似可以延續全勝佳績！事關已提早出線嘅「鬥牛兵」，有傳會派副選出戰要爭分入附加賽嘅捷克，朱楓捧硬2倍「讓球主勝」！


（有線61及201周六凌晨2:45直播）

收起佩奧爾 碧基

隨住上輪大勝列支敦士登，西班牙亦以6戰全勝佳績，提早鎖定I組首名，直接進身明年決賽周。雖然領隊迪保斯基日前話好想贏埋餘下2場分組賽以完美姿態晉級，不過朱楓就覺得難啲，事關已一早有中場恩尼斯達同法比加斯落選嘅「鬥牛兵」，近日再有前鋒尼格度打柴退隊，有指今晚仲好大機會收起佩奧爾（下圖右）同碧基兩大後防主力，畀啲二線兵上陣吸收經驗，加上前線靠近期陷入球荒嘅費蘭度托利斯數胡，你話仲點捧得落？


捷克目前喺I組以10分排第2，領先第3位嘅蘇格蘭僅2分，為保次席出線附加賽，今仗絕對不容有失，淨係戰意已經夠撐，何況捷克今場大部分骨幹都出得，包括車路士門將施治，以及近日因有女友流產、狂操療傷嘅阿仙奴中場路斯基，隨時贏埋都仲得！