秘魯齊腳同巴拉圭鬥大

猪拉多纳

07/10/2011
文： 渡邊年

秘魯主場出戰巴拉圭，秘魯領隊馬卡里安係烏拉圭人，一直有個心願係教番國家隊，美洲國家盃秘魯人腳唔齊下都攞季軍，今次德甲「三叉戟」法芬、比沙路同荷西古里路歸晒位，佢實派盡喪攻，對手巴拉圭有弗爆射手辛達告魯斯坐鎮，喺「乳神」拿莉莎打氣下，一樣大把機會爭取「士哥」，今場一於揀大。


（周六早上９時15分開賽）

法芬比沙路古里路歸隊

秘魯喺早前嘅美洲國家盃因為雲達不來梅射手比沙路同史浩克04前鋒法芬因傷未入選，影響球隊攻力，除咗季軍戰，之前分組賽、８強及４強戰五場全部開細，但今時唔同往日，兩大射手喺德甲都操弗而至，再配合荷西古里路，領隊馬卡里安可以擺出強攻陣同任何對手對撼。


至於巴拉圭方面，多蒙特前鋒巴里奧斯因傷冇入選，但有辛達告魯斯喺度，唔愁冇波入，辛達告魯斯由曼城借去貝迪斯之後翻生，喺貝迪斯唔單止入波，仲擔到畀波助攻嘅工作，佢全面翻生後絕對係對方後防嘅噩夢。


值得一提嘅係，場邊一樣咁精彩，秘魯一眾性感女郎又會入場，同巴拉圭「乳神」拿莉莎比併，不過有一位主隊球迷就肯定冇得睇咯，由於佢隻狗「朱古力」走失咗，佢呼籲國人幫佢搵狗，酬勞就係今場價錢110美元（約860港元）嘅超等位波飛一張。