撐聖日耳門 有道「里」

猪拉多纳

02/10/2011
文： 朱楓

有時做勁旅嘅教練壓力真係大，好似巴黎聖日耳門咁，啱啱周中喺歐霸盃輸波就傳話要換帥，但其實佢哋係刻意留力，準備今晚主場對里昂嘅法甲榜首大戰，試問唔捧1.92倍主W點得？（now631台周一凌晨3:00直播）




經過季初嘅適應期，今季大事增兵嘅巴黎聖日耳門近排終於展現實力，喺法甲贏到開巷，但上周中喺歐霸盃作客卻以0:2不敵畢爾包，賽後即傳球會準備搵現任法國國家隊主帥白蘭斯接手，又話1月會斟卡卡同碧咸。查實聖日耳門喺對畢爾包一戰，冇出射手加美路同翼鋒文尼斯兩大主力，中場柏斯托尼踢咗1個鐘就被換走，擺明留力今晚對里昂嘅大戰，預計主力復出今戰表現會脫胎換骨。


里昂傷兵成籮火力減


里昂今季季前賣走唔少主力，一開咧仲增添唔少傷兵，不過佢哋改用一班青訓產品，仲兼前鋒巴菲迪高美斯突然爆發，暫時表現唔錯。可惜今季上位嘅中場新星加連尼亞，喺對薩格勒布戴拿模嘅歐聯拉傷大腿，今晚肯定缺陣，射手利辛度盧比斯、中場哥古夫同中堅克里斯三大主力亦未必踢得，再睇埋佢哋上季三對聖日耳門都贏唔到，恐怕呢場波想不敗都唔係咁易。