史浩克上盤啃得落

猪拉多纳

02/10/2011
文： 蘇斯黑柴

德甲第八輪壓軸戲，漢堡主場迎戰史浩克04，今仗係史浩克新帥史堤芬斯上任後首場聯賽，佢上任後球隊即刻喺歐霸盃贏波，加上對漢堡實力亦有深入了解，史浩克目前人腳實力同士氣都勝一籌，即使今仗作客要讓平半，黑柴都捧客軍。（有線61及204台周日晚11時30分直播）




史堤芬斯喺九六至○二年曾經執教史浩克，並先後帶領球隊贏得歐洲足協盃冠軍、德國盃冠軍同聯賽亞軍，今次回巢亦深受各方睇好，有73%史浩克球迷認為佢係接任蘭歷克教職嘅最適合人選。




史堤芬斯上任後，上周中立即帶領史浩克喺歐霸盃以三比一殺退海法馬卡比，全隊目前士氣高昂，該役左閘基斯甸富治斯兩個罰球建功，今仗遇上聯賽最怕死球嘅漢堡，隨時再次得米。事實上，史堤芬斯作風穩健，而且用人合理，給予王牌射手魯爾更多自由度，令到球員更加信服。何況佢喺○七至○八年球季曾經臨危受命，幫助漢堡救亡，對主隊亦有相當了解。




本來，史堤芬斯喺回巢之前，曾經同漢堡斟介，不過漢堡體育主管阿連臣對史堤芬斯嘅斟介誠意不足，原因係私心太重，今季季前大量引入喺車路士未能成材嘅小將已經惹起球迷不滿，而炒咗主帥奧寧後，佢唔畀機會正執教德國U18嘅漢堡名宿賀巴殊，亦刻意刁難史堤芬斯，其實係想搵當年於阿積士嘅戰友雲巴士頓，呢種偏私做法已經開始令佢喺球隊失去公信力。


林志堅都頂唔住


漢堡上仗雖然喺臨時主帥卡度素帶領下反勝史特加，港血小將林志堅更一炮而紅，但全隊發揮水準唔算高，防線依然漏洞甚多，今仗遇上士氣如虹嘅史浩克應處下風。