拜仁無懈可擊強搶「芬」

猪拉多纳

01/10/2011
文： Kit

十場不敗零失球！呢個紀錄，居然係由拜仁慕尼黑率先締造，真係難以置信，尤其係我個幾月前喺安聯球場親眼見證過拜仁喺開鑼戰輸畀慕遜加柏，當時又點會估到呢隊衰波可以咁勁！咁踢落去，睇嚟今季德甲又變番一隊獨大，唔使玩咯！今晚德甲拜仁作客賀芬咸，冇理由唔繼續捧場。（有線61及64周六晚9:30直播）




拜仁門將紐亞愈踢愈融入，季初啲蝦碌嘢唔見晒，再加埋中後場球員逐步配合得宜，路爾斯古斯達禾中場緊迫，拍甩唔少波，仲有前場列貝利連同馬里奧高美斯，都一齊重拾巔峰狀態，連洛賓都已經好得七七八八，前、中、後三線都係無懈可擊，今季先上任嘅教練軒歷基斯飲得杯落啦！因為之後係國際賽周期，又冇歐聯跟尾，今晚拜仁作客賀芬咸，理應唔使留力。




賀芬咸賴恩巴布頻失機




賀芬咸自從轉踢新主場後，成績一直都係唔上唔落，佢哋目前狀態最好嗰個係射手賴恩巴布，雖然自復出後都射入唔少波，仲重返埋荷蘭國家隊，不過佢同時亦係「失機王」，近幾場有好幾個必入球都就咁飛炒，望門興嘆！唉！信唔過。




其實現階段都冇邊支球隊可以擋得住拜仁，強如曼城都畀佢哋踢到一戙都無，所以小妹會繼續支持拜仁可以將贏波紀錄延續落去。當日我喺安聯買嘅拜仁波衫，呢排真係可以着多幾次出街威威喇！


KIT推介：拜仁慕尼黑（勝）


有線球彩台主持KIT

電郵：soccer64@cabletv.com.hk

PHONE波熱線：1831 678

「超級星期六」開放時間：晚上9:00至深夜2:30