曼城省招牌打爆「冇力般」

猪拉多纳

01/10/2011
文： 走肖

助教都走埋，點似識反彈？布力般流浪今晚喺英超主場對曼城，想攞1分都唔容易，雖然布力般領隊堅恩暫時未畀人炒魷，但佢嘅助教約翰贊臣已提早講再見，即係話，堅恩已經進入被炒倒數階段，軍心崩潰隨時變咗「冇力般」，對家曼城要贏波省招牌，1.47倍客W咪嫌熱。（有線201及301周六晚10:00直播）


殘陣布力般等易帥


表面上布力般連盃賽近4場有2勝1和1負，但其實聯賽排第18位，印度班主唔肯掟錢買人，固然係布力般要護級嘅主要原因，不過現代足球世界，幾乎咩事都會入教頭數，日前布力般宣布上任9個月嘅助教約翰贊臣提前離隊，目的就係向堅恩作出警告。


曼城往績贏成條街


依家堅恩承受緊難以想像嘅壓力，假如布力般對曼城搶唔到分，佢應該好快會收大信封。大家知啦，當一個人壓力爆煲，判斷力就會大幅度下降，加上布力般有中場鄧尼、中堅史葛丹恩、右閘沙加度、後衞馬田奧臣同隊長賴恩尼爾遜養傷，咁嘅環境邊似惡得出？




另一方面，曼城喺歐聯慘敗後即刻被傳媒圍插，但佢哋勝在夠多人，就算上季英超神射手泰維斯被雪藏，都有巴洛迪利扮演超級後備，而且大把星排住隊等上陣，無論領隊文仙尼揀咩人落場，都有足夠條件搶3分，唔好忘記，近5次對賽曼城有4勝1和，恰死對方架！