拜仁撻着冇得擋

猪拉多纳

01/10/2011
文： 蘇斯黑柴

德甲早場直播賀芬咸主場鬥班霸拜仁慕尼黑，現階段嘅拜仁已經去到無堅不摧同牢不可破嘅境界，黑柴相信除咗「地上最強」嘅巴塞隆拿之外，佢哋對乜都冇有怕，今晚即使作客亦可以延續強勢，照捧2.1倍「讓球客勝」。（有線61及64台周六晚9時30分直播）




拜仁啱啱喺歐聯以2:0擊敗英超富豪球會曼城，保持在各項賽事十連勝之餘，入28球仲要零失球，門將紐亞至今保持928分鐘不失球紀錄，無論攻守都無懈可擊。事實上佢哋喺老帥軒歷基斯調教下大有進步，着重控球在腳踢法相當慳力，即使連拚亦唔使擔心體能。軒歷基斯目前更遇上幸福的煩惱，由於當弗猛將太多，「魔翼」洛賓投訴對曼城嘅上陣時間太短，今仗復任正選必然盡顯身價，前線仲有經驗豐富射手奧歷傷愈復出，每個球員為爭正選，無論對邊隊都唔會錫身，現階段邊隊遇上佢哋都只能嘆句唔好彩。


賀芬咸近三對碰全敗


賀芬咸季初成績唔曳，不過年輕球員太多，演出難免反覆，上仗作客淨吞科隆兩蛋，全場捱打表現甚差，若非門將史達基屢救險球踢出超水準，佢哋已經大敗一場。今仗賀芬咸全城都極重視拜仁來訪，但心態上竟然好似辦外隊咁興奮，因為佢哋身為德國人都以拜仁嘅表現自豪，但球會同球迷只係想睇場好波，唔敢對今仗有太大期望。賀芬咸升上德甲後對拜仁兩和四負未贏過，近三次碰頭全敗，目前雙方實力同狀態差距更明顯，今晚唔夠料做攔路虎。