曼市大反擊

猪拉多纳

01/10/2011
文： 蘇豪

今晚英超賽事，周中失意歐聯嘅「曼市雙雄」齊齊出擊，曼聯主場對諾域治，曼城作客布力般流浪。兩強於英超實力超班，受挫下必全力博反彈，入球唔會少，有望上演「大」反擊。




曼聯近期連和兩場，仲有唔少主力受傷，似有回落之勢，不過紅魔鬼今晚返主場迎戰諾域治，對手只得英冠水平，曼聯就算半力出擊都夠殺，主勝冇肉食，改捧入球大！（有線200及300台周六晚10時直播）




曼聯前仗對史篤城和波，剛於歐聯對巴素利又失分，主帥費格遜肯定開行風筒鬧醒班衰仔，眾星今次唔敢託大。紅魔鬼主要傷兵包括守將尼曼查維迪、拉菲爾達施華、基斯史摩寧及中場湯卡華利等，進攻重心朗尼亦因傷缺陣，令前線火力受削，不過對住弱旅諾域治，求其用奧雲或貝碧托夫都得啦！


主場平均省４粒


諾域治開季頭四戰不勝，近兩周聯賽反彈贏波，叫做適應咗英超賽事，但兩場勝仗對手只屬保頓同新特蘭，考驗唔算好大，今次作客奧脫福球場形勢完全唔同晒，預期會畀紅魔撳住狂攻，未必頂得住。諾域治守將迪拿特因為借用條例無法倒戈戰曼聯，防線少個人調配，情況唔多樂觀。




計埋聯賽及歐聯，曼聯今季主場四戰轟入十七球，平均每場入四球有多，火力驚人。紅魔鬼年輕鋒將韋碧克腳風順，快翼艾舒利楊格弗到漏油，大軍級數遠超對手，預計可輕鬆大勝，入球中位數改為3.5球，照捧大盤！