默郡打吡獻細

猪拉多纳

01/10/2011
文： 樂比堅尼

英超默西賽德郡打吡戰今晚爆發，愛華頓主場對利物浦。「紅軍」今季表現較為飄忽，尤其係聯賽作客連輸兩場，但「拖肥糖」愛華頓亦欠缺入球本錢，主力前鋒卡希爾有傷上陣成疑，兩隊今仗隨時處於膠着狀態，樂比仔捧細盤及半場和。（有線200及300台周六晚7時45分直播）




兩軍季初表現都較預期稍差，利物浦雖排第五，更有擊敗阿仙奴佳績，但今時今日幾乎隊隊都贏到阿仙奴，利物浦贏波亦唔算叻，反而作客輸畀熱刺及史篤城，反映出球隊作客表現唔夠穩定。




其實自杜格利殊接掌利物浦後，球隊踢法全面咗，唔會再好似以前咁，倚賴一兩名球員，但從另一個角度睇，依家嘅利物浦欠缺中場核心及精神領袖，當踢逆境波嘅時候，完全冇反擊之力，即使隊長謝拉特近期復出，不過今仗好可能繼續擔任後備，紅軍要作客贏波絕非易事。


半場和揸得過


愛華頓今季財政問題亮起紅燈，放走主將阿迪達後，只係買咗幾件大後備，大部分主力都係用番舊將，雖然默契係好，但班人夾得太耐，踢落欠缺火花及激情，球隊最大問題係攻力不足，前面經常要搵卡希爾、奧士文客串踢前鋒，導致「拖肥糖」季初成績不振。兩軍近十次交手有八次開細，細盤值得捧場。另外，既然預計戰情緊湊，兩隊冇乜波入，不妨捧埋半場和。