巴塞強細撲巴迪

猪拉多纳

28/09/2011
文： 法比加輝

歐聯分組賽Ｈ組賽事，白俄巴迪因主場不合歐聯規格，要移師到明斯克戴拿模球場對巴塞隆拿。無可否認巴塞近期已回復水準，上場大炒馬體會五球，再度展示遇強愈強嘅特質，但加輝並唔認為「地上最強」會再蹂躪對手，事關教練哥迪奧拿最常喺歐聯留手，分組賽夠分出線就收貨，所以入球大細中位數調高至3.5球，加輝今場揀1.75倍細盤。（有線64及204台周四凌晨２時45分直播）




巴塞應付聯賽同歐聯嘅態度一向有多少分野，而且亦有績可尋。睇番上季歐聯分組賽，巴塞除咗有兩場失分之外，亦甚少大炒對手，六場賽事僅得一場總入球達到四球或以上。再睇埋前季歐聯分組賽，巴塞同樣勒住踢，六場波僅贏三場，而且冇一場總入球達到四球，若然入球大細中位數以3.5球去計，巴塞對上兩季共十二場分組賽，就只係開得一次大而已，所以千祈咪盲目捧大。


巴迪死守唔會大敗


事實上喺歐聯分組賽入得多波，根本作用唔大，入到淘汰賽咪又係從頭嚟過！所以聰明嘅哥迪奧拿已經習慣喺歐聯分組賽留有一手，唔好要班兵搏得太盡。再者，縱然今場唔係喺巴迪主場比賽，但其實明斯克戴拿模球場佢哋都已經踢慣踢熟，若然一心死守應該不致多失，所以加輝對入球細都頗有信心。