熱捧入球細 冷敲窿對窿

猪拉多纳

25/09/2011
文： 自由恆

唔少西甲球隊財政雖然唔多健全，差唔多有一半球隊波衫冇胸前贊助，仲成日聽到有欠薪情況出現，不過今季賽事發展就比想像中健康得多，兩大班霸巴塞隆拿同皇家馬德里即使都試過大比數贏波，但面對中游球隊已無冇必勝把握，兩強不單止已經連環失分，更非坐穩頭兩位，從觀
賞角度嚟講絕對係好事。

無疑彼此實力好似拉近咗，但仍然有個別西甲球隊都幾唔入流，火力異常疲弱，經過頭4輪比賽之後，竟然有8隊波平均每場都入唔到1球，今晚好幾隊死火球隊會進行混戰，睇怕都係悶戰連場。


兩隊都係4戰有3場交白卷


就好似今晚場CF格蘭納達主場對奧沙辛拿，兩隊波係就係都已經打開今季勝利之門，不過彼此火力都一樣咁唔掂，都係4戰有3場交白卷，兩隊都冇帶兵器喺身，冇理由唔再追多次細。如果嫌1.59倍入球細唔夠好分，可以細細哋玩吓8倍嘅0:0波膽。（now632及660台周一凌晨0:00直播）


足球重心：CF格蘭納達（入球細、0:0）


馬膽推介：10場7 大家勝利

「大家勝利」喺開鑼日雖然只係贏弱旅，但孭住131磅改以後追跑法一攻而破，似乎本身亦有大幅進步，今仗有多匹未熱身嘅明星馬孭飛，賠率肯定唔會乏味，有機會成為本季第一匹連捷馬。