昆士柏露餡咬唔入維拉

猪拉多纳

25/09/2011
文： 樂比堅尼

今晚英超昆士柏流浪主場對阿士東維拉。昆士柏流浪獲新班主費爾南德斯入主後，羅致祖爾巴頓、胡禮菲臘斯等新球員，戰鬥力大幅提升，但新鮮感已過，隨時打回原形。維拉今季聯賽仲未輸過，戰績相當硬淨，受讓平半樂比仔捧下盤。
（有線200及300台周日晚11時直播）

昆士柏今季升班後贏咗兩場，分別係作客贏愛華頓一比○及上仗贏狼隊三比○，反而主場就未贏過，甚至聯賽盃輸過畀甲組仔羅奇代爾。此現象可能同佢哋踢法有關，因為QPR較擅長踢穩守突擊，由兩翼胡禮菲臘斯及泰拉拔發難，若然主場要佢哋主攻，反而踢得縛手縛腳，防線仲出現好大漏洞添！


維拉聯賽保不敗


維拉今季成績非常平穩，聯賽五戰一勝四和，睇得出麥利殊宗旨係先求不敗，再求贏波。維拉今季喺有限資源下，依然踢出呢個成績，麥利殊絕對功不可沒。

維拉今仗唯一壞消息係前鋒戴倫賓特及希斯基均有傷，但艾邦拉荷今季演出搶鏡，由佢擔任單箭頭，再配合馬克艾拜頓及尼索比亞兩翼側擊，效果相當唔錯。昆士柏雖然係實力最強嘅升班球隊，但今場要讓波真係過火，樂比仔梗係撐下盤啦！