斑馬醒神撞散卡坦尼亞

猪拉多纳

25/09/2011
文： 鄭少偉

不經不覺意甲已經踢咗三輪喇，唔少傳統勁旅表現都幾令人失望，反而上季連歐洲賽入場券都攞唔到嘅「斑馬軍團」祖雲達斯，開季以嚟表現似模似樣，今晚作客卡坦尼亞，如無意外應該可以順利開出1.9倍客勝！（開賽時間︰周日晚9:00）


卡坦尼亞往績輸晒


講時講，祖雲達斯如果唔係「電話門事件」後，畀人踢落乙組搞到星散，米蘭雙雄都未必可以發到圍！數數手指，祖記自2007年球季重返意甲，眨吓眼已經4季，今季喺教練干地率領下，開季以嚟都畀支持者唔少憧憬，起碼踢咗3輪錄得2勝1和先呀！證明季前會方肯大灑金錢，羅致新兵兼買斷陣中主力嘅決定係正確嘅。

最難得係爭霸分子國米、羅馬同衞冕嘅AC，一出閘齊齊脫腳，造就演出穩打穩紮嘅「斑馬」，同熱拿亞喺榜首你追我趕。「斑馬」今季咁精神，新舊球員擦出火花係主要原因，就算黑山射手胡仙歷今場停賽，鋒力唔會有好大影響。唔好忘記佢哋仲有後備殺手迪比亞路，只要干地見唔對路派佢上場，佢就一定交足貨。

無錯主隊卡坦尼亞開季表現唔錯，不過排緊第11位嘅佢哋入球能力一直偏低，今季踢咗3場只入過一球12碼！佢哋仲要近6次主場對祖記只得2和4負未贏過，淨係呢一點值得「亨利」撐祖記W！最後想講多少少，就係無論你支持邊隊，都希望大家多多支持港甲，因為你嘅支持就係我同所有行家嘅最大鼓勵。