路華拿東洋星照

猪拉多纳

25/09/2011


路華拿位處意大利西北部，與球隊祖雲達斯同屬皮德蒙特大區，三面皆被阿爾卑斯山包圍。區內分成八個省份，包括路華拿所在省份諾瓦拉省，地方以農產業最出名，包括稻米及粟米。而食物加工、藥業、化工及物流業都係諾瓦拉主要經濟來源。

路華拿上季喺附加賽成功砌低迪比亞路母會帕多瓦，相隔五十五年重返意甲行列。查實路華拿近三十年只喺意大利第三及第四級聯賽中浮沉，去到兩年前先至有突破性發展，而礙於財力所限，球隊今季未有大灑金錢增強戰鬥力，大部分新兵都係以自由身或者外借身份來投，而陣中最具名氣球員，一定係來自日本嘅森本貴幸。

森本貴幸早於○六年七月就去到意大利發展，作戰水平正不斷提升。今季轉投到路華拿唔係賣波衫咁簡單，對於球隊確有實際幫助。


人造草場考起強隊


另外，路華拿主場施維奧比奧拿球場，屬現今意甲唯一使用人造草嘅球場，唔好睇小人造草威力呀，強如國際米蘭都要輸一比三，累到教練加斯柏連尼連份工都冇埋。所以話路華拿係支非一般升班球隊，唔好當佢冇料到，只要球員打出信心，今季要留守甲組唔係天方夜譚。