巴塞遇空霸大考驗

猪拉多纳

24/09/2011
文： 法比加輝

今輪西甲重頭戲，非巴塞隆拿主場對馬德里體育會莫屬。今季大換血嘅馬體會，在新兵陸續上力下已踢出水準，近兩場均大炒對手四球，火力拍得住「地上最強」巴塞。 兩軍都係崇尚進攻球隊，加輝預期今場會大手交收，入球中位數調至3.5球仍要捧大。（now 632及660周日凌晨4時直播）


馬體會法卡奧着晒火


要數近期最具人氣嘅西甲球會，肯定非馬體會莫屬，近兩場聯賽都大炒對手四比○，其中貴價前鋒法卡奧終於甦醒，兩仗入五球，今場肯定會為巴塞防線構成重大威脅。事實上，巴塞防線近期確漏洞多多，近四仗除對奧沙辛拿外，其餘三場都失兩球，反映教練哥迪奧拿今季改踢三個守將後，失球數字明顯增加。再者，巴塞最弱一環就係防守高空波，要防住「空中霸王」法卡奧有一定難度。




軍情方面，巴塞中堅碧基有可能在今仗復出，而馬體會守將高甸亦可隨時候命。雖然巴塞防線跌Watt，但其攻力就依然有保證，前仗大炒奧沙辛拿八球，足以證明「地上最強」要在魯營主場入波真係易過借火，所以加輝認為兩軍今場會合演入球騷，捧大啱數。