烏甸尼斯趁病攞命

猪拉多纳

21/09/2011
文： 巨高

當大家批評國際米蘭表現差，其實同市球隊AC米蘭一樣咁令人失望，連續三場正式賽事冇贏過。AC季初未上力，而且傷患人數頗多，巨高對佢哋好有保留。烏甸尼斯今季未受主力流失所影響，受讓之下烏甸2.25倍「讓球客勝」值得捧場。（now 633周四凌晨2時45分直播）




烏甸尼斯季前真係畀人睇小，事關阿歷斯山齊士、恩拿、奧保度、丹尼斯及沙柏達華倫西亞等人全部離隊，好多人都擔心球隊表現會急轉直下。但呢支北部球隊大打爭氣波，不僅意甲兩出兩捷，歐霸盃更反勝法甲雷恩。唔敢講烏甸尼斯勁過以前，但依家AC勢弱，今場烏甸作客都唔使赦佢。


烏甸改建球場冧球迷


另外有消息指，烏甸尼斯老闆普素有意改建球場，令球迷可以喺更舒適環境下欣賞賽事。早前烏甸對雷恩期間，主場球迷竟向烏甸大軍「開汽水」，以抗議普素見錢開眼出售主力球員。為咗氹番班球迷，普素梗係要做番啲嘢，以真金白銀為球迷謀福祉。




據講有烏甸尼斯球迷組織對普素嘅改建球場計劃非常滿意，仲話會號召所有登記會員到聖西路打氣。查實普素呢張「期票」都未知能否兌現，但最低限度令支持者有短暫興奮，肯於周中親臨球場打氣，對烏甸爭勝有幫助。




AC傷兵多到你唔信，伊巴謙莫域受傷四周、奇雲保定重創後已飛赴德國搵神醫打救，加埋羅賓奴、岩布仙尼、法米尼、加度素都未康復，AC可用嘅球員真係唔多。難怪教練阿里基都話自己今季黑仔，今仗要贏烏甸有難度。