域陀雷斯o靚衞上位

猪拉多纳

21/09/2011


華倫西亞開季表現理想，近三場比賽更保持清白之身一球不失，都係全靠一條年輕防線！華倫今季換上一對新中堅組合阿爾拉米及域陀雷斯，兩人有身材之餘又靈活，旋即成為華倫迷新寵兒。


華倫向賓尼迪斯致敬


近年致力重組嘅華倫，今季進一步將防線年輕化，新進法國國腳阿爾拉米廿五歲，而回流西甲嘅域陀雷斯更只得廿二歲，加上左閘佐迪艾巴同埋門將古亞達都係二十出頭，「蝙蝠兵團」嘅新防線的確充滿活力。事實上，「阿域配」呢對中堅組合已獲得西班牙媒體大讚，而西班牙領隊迪保斯基更透露有意召域陀雷斯入國家隊，為準備退出國家隊嘅佩奧爾搵接班人。




另一方面，華倫在今場賽前請來前教練賓尼迪斯，並向其作出致敬，表揚賓帥在○二及○四年領華倫奪得聯賽冠軍，成為近十年間唯一能阻止「雙雄」皇家馬德里及巴塞隆拿奪冠嘅球隊。