|
|
18/09/2011
文： 蘇斯黑柴
德甲尾場史浩克04主場鬥班霸拜仁慕尼黑，原本係一場矚目戲碼，可惜撞正英超大戰曼聯對車路士，收視率肯定冇得揮，黑柴希望大家喺曼車完場後睇埋最後廿零卅分鐘呢場波，深信德甲巔峰對決唔會令大家失望。
（有線61及204台周日晚11時30分直播）
史浩克始終係德甲少有能夠經常狙擊拜仁嘅球隊，上季聯賽連盃賽三戰拜仁贏咗兩場，今季主場踢嘅聯賽同歐霸仍然保持全勝，前線有魯爾、亨特拉爾同法芬三位星級戰將攻堅，立心再打老虎。不過，教練蘭歷克喺上輪聯賽輸畀禾夫斯堡同上周中歐霸盃作客布加勒斯特星隊，都出現排陣同臨場調動方面失誤，今晚遇上強敵，呢啲錯誤絕對不容再犯。
「國王」列貝利弗爆
拜仁今仗有洛賓、奧歷同雲拜頓因傷缺陣，馬里奧高美斯啱啱傷愈未必踢得足九十分鐘，但球隊近期喺各項賽事七連勝兼保持不失，一條落重本改造嘅防線經過個半月磨合後開始發揮強橫實力，加上中場線攻擊點多，「國王」列貝利又處於巔峰狀態，冇咗自私獨食嘅洛賓反而令球隊進攻組織更加流暢，今仗唔愁冇波入。拜仁今季最重要引入除咗門將紐亞外，教練軒歷基斯功力亦遠勝上季嘅尹戈爾，佢能夠團結球隊同發揮球員所長，令全隊實力大幅提升，即使作客亦有力一雪上季兩敗恥辱。
今仗另一焦點係拜仁門將紐亞同右閘拿菲爾重返史浩克球場首度倒戈，肯定會面臨主場球迷勁噓，不過紐亞已經喺聯賽同歐聯保持658分鐘不失球紀錄，要成為世界最頂級門神就要經得起考驗。黑柴深信拜仁單憑超班質素足以揚威史浩克球場，捧客W。
|
|
金睛卡
发表于 2011-9-18 08:07
变色卡
显身卡
发表于 2011-9-18 10:52
.gif)