岡崎慎司士哥Sure Win

猪拉多纳

16/09/2011


史特加陣中不乏優質年輕球員，但球隊近季成績唔理想，主要原因係防線不穩同前線把握能力唔強，但近期兩方面都有改善，尤其前線嘅日本射手岡崎慎司，除咗憑優異表現搶得正選席位外，亦踢走咗身價超過八百萬歐元嘅羅馬尼亞射手馬利卡，最終史特加索性免費將後者送咗畀史浩克04。




岡崎慎司今季四度為史特加上陣，已經入咗兩球，而只要佢有波入，史特加都贏波，而且都數對手三蛋。聯賽首輪對史浩克04，岡崎慎司喺完場前十分鐘至後備入替，但最終射入一記令人難忘嘅世界波；上仗鬥漢諾威正選上陣，開賽九分鐘就接應夏歷傳球殺入禁區抽射得手，為球隊打開紀錄，令佢升格成為球隊首席射手。


膺09年世界國家隊最佳射手


岡崎慎司係目前日本國家隊主力前鋒殺手，仲擁有一項驕人紀錄，被國際足球歷史及統計協會選為2009年世界國家隊最佳射手，佢當年為日本國家隊取得15個入球，仲包括兩次連中三元。




史特加今晚對手弗賴堡，陣中亦有日本射手矢野貴章，雖然弗賴堡慣用單箭頭，有柏比斯施斯在陣，矢野貴章難望正選，不過佢上季亦曾十五次為球隊上陣，表現獲好評，今仗若然弗賴堡喺比賽過程中要加強攻力換佢入場，呢場巴符州打吡亦會變成日本打吡添！