富咸荷蘭線人助陣殺「迪」

猪拉多纳

15/09/2011
文： 亨格比利

歐霸盃分組賽今晚開打，K組嘅富咸會同川迪正面交鋒，雖然話富咸新季英超演出麻麻，但佢哋有祖爾同拜仁雷斯兩位「荷蘭線人」助陣，對住川迪應該有計憑地利攞晒3分，敲1.83倍主勝。（有線61及201周五凌晨3:05直播）


川迪有「恐英症」


富咸同川迪可謂千絲萬縷，球員時代踢過川迪嘅富咸領隊祖爾會倒戈，昔日佢喺荷甲亦多次帶隊同現任川迪教頭艾迪安斯打對台，相信大家已經熟晒路。至於今季先由川迪過檔富咸嘅拜仁雷斯，雖然唔合乎上陣資格，但呢位哥斯達黎加國腳賽前就過晒料畀班隊友，即使落唔到場都「交足貨」。




新季英超仲未開齋嘅富咸，由第1圈歐霸盃外圍賽一直殺到入分組賽，歐戰表現比本土聯賽更Sharp醒，川迪話晒啱啱放走咗拜仁雷斯，霎時間冇咗位攻擊靈魂梗要啲時間適應，況且佢哋歷來歐戰11遇英格蘭球隊只得4和7負劣績，造訪矢志反彈嘅富咸唔易砌。