歐聯死亡Ａ組開Show 拜仁頭炮發維

猪拉多纳

14/09/2011
文： Mic少

歐聯A組大戰，「黃色潛艇」維拉利爾主場對拜仁慕尼黑，雖然話呢組集齊四大聯賽球隊，被稱為「死亡之組」，但細心分析一下，其實形勢並非想像中咁激烈，尤其係今仗兩隊無論財力、人腳及狀態，拜仁都遠勝對手，拜仁小讓平半，捧上盤。




（有線63及203台周四凌晨2時45分直播）


維拉利爾莫財冇得砌


今時今日球壇，想攞好成績，最緊要有錢，因此A組只屬拜仁及曼城之爭。來自「歐豬」西班牙嘅維拉利爾及意大利嘅拿玻里莫財難發圍。其中維拉利爾仲搵唔到球衣胸前位置廣告，今季未有特別增兵應付歐聯之餘，更賣走主力辛迪卡索拉套現解財困，導致成績顯著下滑，首場聯賽吞巴塞五蛋後，上仗亦被西維爾逼和，情況有幾惡劣可想而知。以維拉利爾現時班底，難以喺歐聯立足。




德國身為歐洲經濟強國，德甲賺錢能力拍得住英超，拜仁財政健全，球員唔怕冇糧出，可以專心搏殺，淨係呢點已比對手優勝好多。而且德甲比西甲早開鑼，拜仁球員已全面操起狀態，包括歐聯外圍賽，拜仁取得六連勝，共入十九球兼不失，試問維拉利爾點抵擋？值得一提，今屆歐聯決賽將於拜仁主場舉行，更加刺激球隊要爭取佳績，當然渴望喺首場分組賽打響頭炮。